महोत्तरीमा ‘सेमिअटोम्याटिक’ पेस्तोलसहित दुईजना भारतीय नागरिकलाई सशस्त्र प्रहरीले नियन्त्रणमा लिएको छ।
दुई राउन्ड लोडेड गोलीसहित हतियार फालेर भाग्न खोजेको समूहमध्येबाट सशस्त्र प्रहरीले दुईजनालाई पक्राउ गरेको हो । सशस्त्र प्रहरीका अनुसार समूहका अन्य भने भाग्न सफल भएका छन् ।
पक्राउ पर्नेमा भारतकाे सितामढी जिल्ला, ग्राम पन्चायत बाजपट्टी निवासी १५ वर्षीय राजकुमार दास र सोही ठाउँ बस्ने वर्ष १९ का मुकेशकुमार मण्डल रहेको सशस्त्र प्रहरी उपरीक्षक सुरेश सापकोटाले जानकारी दिए ।
मनरा सिस्वा नगरपालिका– १० मरुवाहीमा मदिरा भट्टीमा स्थानीय केही व्यक्तिहरुसँग भनाभन भएपछि सोही भनाभनपछि कुटपिट भएको र पछि उनीहरु भाग्न खोज्दा एक राउन्ड हवाई फायरसमेत गरेको स्थानीयले बताए ।
राति करिव ८ बजे भएको उक्त घटनाकै क्रममा स्थानीयहरुले सशस्त्र प्रहरीलाई खबर गरेपछि घटनास्थल पुगेको बिओपी मरुवाहीको सशस्त्र प्रहरीको मोबाइल टोलीले भाग्दै गरेको अवस्थामा सीमा नजिकैबाट उनीहरुलाई नियन्त्रणमा लिएको हो ।
उनीहरुसँग ‘सेमिअटोम्याटिक पेस्तोलमा लोड भएको दुई राउन्ड ७.६५ एमएम को गोली, एक स्प्रिंग चक्कु (डाइगर), मोबाइल र पर्स सशस्त्र प्रहरीले नियन्त्रणमा लिएको छ।
उनीहरुलाई अनुसन्धान र आवश्यक कारबाहीको लागि जिल्ला प्रहरी कार्यालय पठाउने तयारी भइरहेको सशस्त्र प्रहरी उपरीक्षक सापकोटाले बताए ।
पक्राउ परेका दुईजनाले पेस्तोल र चक्कु आफुहरुको नभएको र अन्यले नै फालेर भागेको बताए । उनीहरुले आफुहरु लेवरको काम गर्ने भएको र नयाँ वर्षमा मदिरा सेवन गर्न नेपाल छिरेको बताए । तर, स्थानीयले सशस्त्रले बरामत गरेको हतियार उनीहरुकै भएको दाबी गरे ।