राष्ट्रिय प्रजातन्त्र पार्टी (राप्रपा)ले राजसंस्था पुनःस्थापनाको मागसहित प्रदर्शन गरेको छ । प्रधानमन्त्रीलाई ४० बुँदे मागपत्र बुझाउनुअघि राप्रपाले जनप्रदर्शन गरेको हो ।
०५२ सालमा माओवादीले ४० बुँदे मागपत्र बुझाएर थालेको आन्दोलनको परिणाम गणतन्त्रमा पुगेकै शैलीमा राप्रपाले ४० बुँदे मागपत्र बुझाउन लागेको हो । राप्रपाको मागपत्रमा राजसंस्था पुनःस्थापन, प्रदेश खारेजी, हिन्दुराज्य पुनःस्थापनासहितका राजनीतिक र जनजीविकाका विषयहरू पनि समेटिएका छन् ।
अध्यक्ष राजेन्द्र लिङ्देनको नेतृत्वमा काठमाडौंस्थित भृकुटीमण्डबाट सुरु भएको प्रदर्शन नगर परिक्रमापछि भृकुटीमण्डपमै फर्केर आमसभा गर्ने राप्रपाको तयारी छ । नगरपरिक्रममा पछि अध्यक्षसहितका प्रमुख नेताले मागपत्र बुझाउने राप्रपाले जनाएको छ ।
प्रधनमन्त्रीलाई मागपत्र बुझाएर फर्किएपछि अध्यक्ष लिङ्देनले आमसभालाई सम्बोधन गर्ने बताइएको छ । राप्रपाले जिल्ला समितिमार्फत आजै सबै जिल्लाका प्रमुख जिल्ला अधिकारीलाई सोही मागपत्र प्रदान गर्ने कार्यक्रम छ ।
