रमेश कुमार पाण्डे
सुर्खेत,१८ जेठ ।
सुर्खेत उद्योग वाणिज्य संघले जिल्लामा रहेका सबै बैंकहरूसँग आवश्यक सहयोग आह्वाहन गरेको छ । बिहीबार संघका पदाधिकारीले बैंकका शाखा प्रबन्धकसँग आवश्यक सहयोगका लागि भन्दै अनुरोध पत्र बुझाएको छ । वाणिज्य संघले कोभीड–१९ को विश्वव्यापी महामारीका कारण करिव दुई वर्षसम्म ठप्प रहेको आर्थिक गतिविधि कोभिड नियन्त्रणपछि आंशिक रुपमा चलायमान हुँदै गएको उल्लेख गरेको छ ।
संघले त्यसैमा नेपाल राष्ट्र बैंकले जारी गरेको चालू पूँजी निर्देशिका २०७९, बैंकहरुमा देखिएको तरलता अभावका कारण ऋण प्रवाहमा गरिएको संकुचन तथा कर्जा असुलीमा गरिएको कडाईका कारण निजी क्षेत्र फेरि तहस नहश हुने संघारमा पुगेको बताएको छ ।
साथै आर्थिक गतिविधि शिथील हुँदै जाँदा फर्म पसलहरु दिनप्रतिदिन बन्द हुँदै गएपछि मुख्य बजारहरुमा सटर बन्द रहेको र आर्थिक गतिविधि नै ठप्प भएपछि व्यवसायीहरु पलायन मात्र नभइ मानसिक तनावमा पुगेको भन्दै वाणिज्य संघले बैंकहरु सँग सहयोग मागेको छ ।
यस्तै, संघले बैंकहरुबाट निजी क्षेत्रले यसअघि कहिल्यै भोग्न नपरेको आर्थिक संकटको सम्वेदनशील क्षणमा एक अर्काका परिपूरकका रुपमा बैंक तथा वित्तीय संस्थाहरुले निजी क्षेत्रलाई ठडिनका लागि आडभरोसा दिई असल सहयात्रीको जिम्मेवारी निर्वाह गरोस् भन्ने आशा राखेको वाणिज्य संघका अध्यक्ष लक्ष्मण कँडेलले जानकारी दिए ।
‘हिजो परिस्थिति सहजहुँदा उद्योगी व्यापारीका घरदैलोमै आएर सस्तो ब्याजदरमा शुलभ रुपले ऋण लिन उक्साउने बैंकहरूले अहिले चरम् आर्थिक संकटको बेला जम्मा÷जम्मी ३ महिना मात्र ब्याज किस्ता बुझाउन नसकेकै निहुँमा सोझैं धितो लिलाम गर्ने जस्ता कार्यले निजी क्षेत्र पूर्णरुपले हतोत्साही हुँदै गएको छ। यसरी उद्योगी व्यापारीहरु दिनहुँजसो निरुत्साहितहुँदै जाने हो भने बैंकहरुको पनि अस्तित्व संकटमा पर्दै जाने वास्तविकतालाई बैंकले बिर्सनु हुँदैन्,’ उनले भने ।
अध्यक्ष कँडेलले निजी क्षेत्रमाथि आईलागेको आर्थिक संकट र बाध्यताकाबीचबाट आफ्नो फाइदा मात्र उठाउने नभई मानवीय हिसाबले पनि निजी क्षेत्रको सहयोगी र आर्थिक समृद्धिको साझेदारका रुपमा अगाडी बढ्न बैंकहरुलाई आग्रह गरे ।
साथै कँडेलले उद्योगी व्यापारीको सर्बश्व सखाप हुने गरी धितो लिलामलाई मात्र विकल्पका रुपमा नहेरी आर्थिक संकटबाट उकास्नका लागि ऋण भाखा नाघेको अवस्थामा म्याद थप, कर्जा नविकरण आदि जस्ता सहयोगी नीति अख्तियार गरी निजी क्षेत्र र बैंक दुबै पक्षको समझदारी गर्न अनुरोध गरे । यसैबीचमा संघले नेपाल राष्ट्र बैंक सुर्खेत मार्फत नेपाल राष्ट्र बैंक गर्भनरलाई पनि ध्यानर्षण पत्र पठाइएको छ ।
