मन्त्रिपरिषद्‌का निर्णय सार्वजनिक

अर्थ, सूचना तथा सञ्चारमन्त्री युवराज खतिवडाले मन्त्रिपरिषदका निर्णय सार्वजनिक गरेका छन् । नियमित पत्रकार सम्मेलनमार्फत बिहीबार मन्त्रिपरिषद्का निर्णयहरु सार्वजनिक गर्दै खतिवडाले भूमि व्यवस्था, सहकारी तथा गरिबी निवारण मन्त्रालय अन्तर्गतका योजना कार्यान्वयन गर्न ४२ जना राजपत्रांकित अधिकृतहरुको अस्थायी दरबन्दी स्वीकृत गर्ने बताए ।

मन्त्रिपरिषद बैठकले गरेका निर्णयहरु यस्ता छन् ।

१. लगानी बोर्डको प्रमुख कार्यकारी अधिकृत पदमा सुशील भट्टलाई नियुक्त गर्ने ।

२. नेपाल एकद्वार प्रणाली आयोजना कार्यान्वयन एकाई सञ्चालनका लागि अर्थ मन्त्रालय अन्तर्गत मौजुदा दरबन्दीबाट पदपूर्ति गर्ने गरी चालू आर्थिक वर्ष २०७७/७८ मा आवश्यक पर्ने ७ जना राजत्रांकित पदहरूको अस्थायी दरबन्दी स्वीकृति गर्ने ।

३. बेरुजु फर्छ्योट मूल्याङ्कन र अनुगमन समितिको सदस्यसचिवमा रमा जोशी दुलाललाई दुई वर्षका लागि मनोनयन गर्ने ।

४. रुग्ण उद्योगको पहिचान, वर्गीकरण, पुनरुत्थान, पुनर्निर्माण तथा व्यवस्थापनका लागि नेपाल सरकारलाई सुझाव दिन श्री दीपक सुवेदीको संयोजकत्वमा ६ सदस्यीय समिति गठन गर्ने ।

५. स्याङ्जा जिल्ला, अर्जुनचौपारी गाउँपालिका वडा नं १ को ३० रोपनी जग्गा प्रशासकीय भवन लगायतका पूर्वाधार विकास गरी सञ्चालन गर्न ३० वर्षे दीर्घकालीन लिजमा उपलब्ध गराउन स्वीकृति दिने ।

६. भूमि व्यवस्था, सहकारी तथा गरिबी निवारण मन्त्रालय अन्तर्गत सञ्चालन हुने आयोजना तथा कार्यक्रमहरु कार्यान्वयन गर्न ४२ जना राजपत्रांकित अधिकृतहरुको अस्थायी दरबन्दी स्वीकृत गर्ने ।

७. भुजुङ्ग हाइड्रोपावर प्रा.लि.लाई माथिल्लो मिदिम जलविद्युत आयोजनाको पावरहाउस, हेडवक्र्स, पेनस्टक र पहुँचमार्ग लगायतका भौतिक संरचनाहरु निर्माण गर्नका लागि अन्नपूर्ण संरक्षण क्षेत्र अन्तर्गत पर्ने लमजुङ जिल्लाको क्व्होलासोथार गाउँपालिका ४ मा रहेको ८.९८ हेक्टर सरकारी वन क्षेत्रको जग्गा प्रयोग गर्न स्वीकृति दिने ।

८. नेपाल प्रशासन सेवा, राजपत्रांकित प्रथम श्रेणीका सहसचिव वीरबहादुर राईलाई विशिष्ट श्रेणीको सचिव पदमा बढुवा गर्ने ।

९. सहरी विकास मन्त्रालय अन्तर्गत सञ्चालन हुने विकास आयोजना र कार्यक्रम सञ्चालनका लागि राजपत्रांकित पदका २ सय ९२ अस्थायी दरबन्दी स्वीकृत गर्ने ।

१०. स्वास्थ्य बिमा बोर्डको अध्यक्ष पदमा भुम्लुटार ८, काभ्रेपलाञ्चोक निवासी डा. सेनेन्द्रराज उप्रेतीलाई नियुक्त गर्ने ।

११. ट्रङ्क लाइन तथा डेडिकेटेड फिडरबाट भएको विद्युत आपूर्ति सम्बन्धमा विद्युत उपभोगकर्ता उद्योगी व्यावसायीहरू र विद्युत प्राधिकरणबीच देखिएको विवादलगायतका समस्याको समाधान मन्त्रालय र मातहत निकायबाट समन्वयात्मक रूपमा गर्ने गरी नेपाल सरकार मन्त्रिपरिषद्को मिति २०७६।९।२१ को निर्णयबमोजिम ऊर्जा, जलस्रोत तथा सिँचाइ मन्त्रालयका सचिवको संयोजकत्वमा गठित समितिले पेस गरेको प्रतिवेदन कार्यान्वयन गर्न ऊर्जा, जलस्रोत तथा सिँचाइ मन्त्रालयलाई निर्देशन दिने।

१२. सन्धि सम्पन्न गर्नेसम्बन्धी निर्देशिका, २०७६ को मस्यौदामा स्वीकृति प्रदान गर्ने।

१३. नर्म्स फर रेट एनलाइसिस अफ रोड टनेल कन्स्ट्रक्सनु २०७७ स्वीकृत गर्ने।

१४. वैयक्तिक गोपनीयतासम्बन्धी नियमावली, २०७७ स्वीकृत गर्ने।

१५. नेपाल नेसनल बिल्डिङ कोड एनबिसी १०५:२०२०, सेइस्मिक डिजाइन अफ बिल्डिङ इन नेपाल स्वीकृत गर्ने।

१६. सुनकोशी मरिन डाइभर्सन बहुउद्देश्यीय आयोजनाको सुरुङ निर्माण कार्यको नर्म्स स्वीकृत गर्ने।

१७. नेपाल सरकार र भारत सरकारका वीचमा प्रथम पटक मिति २००८ अगस्ट ६ मा सम्पन्न भएको साना विकास आयोजना सञ्चालन सम्झौतामा नेपाल सरकार मन्त्रिपरिषद्को मिति २०७४।०८।१४, २०७५।०३।२४, २०७५।११।२८ र २०७६।०९।०७ को निर्णयानुसार कायम गरिएको सर्त र आयोजना कार्यान्वयन ढाँचा कायम रहने गरी उक्त सम्झौताको म्याद सन् २०२३ अगस्ट ५ सम्म थप गर्ने ।

Leave a Reply

Your email address will not be published. Required fields are marked *

Back to top button
>
Close