सुर्खेत । प्राकृतिक सुन्दरतासँगै साहसिक पर्यटनको सहरका रुपमा चर्चा कमाएको शहर हो पोखरा । प्याराग्लाइडिङको मज्जा लिन सयौं पर्यटक पोखरा पुग्ने गर्छन् । साहसिक पर्यटनमा पर्यटकहरूको मन जित्ने ठाउँको रूपमा पनि पोखरा चर्चामा छ । त्यहाँ पुग्ने आन्तरिक तथा बाह्य पर्यटकको रोजाइमा प्याराग्लाइडिङ पर्छ ।
तर प्याराग्लाइडिङको मज्जा लिन पोखरा धाउनु पर्ने बाध्यताको अन्त्य गर्न कर्णाली प्रदेशको राजधानी वीरेन्द्रनगरमै सञ्चालन गर्न लागिएको छ । निजी क्षेत्रले कर्णाली प्रदेशको पर्यटन प्रवर्द्धनमा टेवा पुर्याउने उदेश्यले प्याराग्लाइडिङ सेवालाइ नियमित गर्ने गृहकार्य थालेको हो ।
आन्तरिक तथा बाह्य पर्यटकलाई आकर्षित गर्न प्याराग्लाइडिङमा विशेष सहुलियतसहितको सेवालाइ निरन्तरता दिन लागिएको छ । वेलकम प्याराग्लाइडिङ प्रा.लि.ले वीरेन्द्रनगरको गढीदेखी वीरेन्द्रनगरको वडा नम्बर १ को देउती थानसम्म उडान गर्ने अनुमति पाएको छ ।
नीजि पर्यटन कम्पनीले वेलकमले टिकट बुकिङ खुला गरेको घोषणा गरेको छ । कर्णालीमा पर्यटन गतिविधि अगाडि बढाउन प्याराग्लाइडिङबाट गोठीकाँडादेखि वीरेन्द्रनगर भ्याली भ्रमणका लागि फोटो र भिडियोसहित चार हजार पाँच सय रुपैयाँ कायम गरेको छ । यो दरमा पर्यटकलाइ फोटो र भिडियो आवश्यक नपरेको खण्डमा तीन हजार पाँच सय रुपैयामा प्याराग्लाडिङको मज्जा लिन सक्नेछन् ।
