नेपाल एयरलाइन्सको नेपालगन्जदेखि कर्णलीका दुर्गम जिल्लामा उडान हुने जहाजमा अनलाइन टिकट प्रणाली लागु गरिएको छ । नेपालगन्जबाट उडान हुने जिल्लाहरू जुम्ला, हुम्ला, डोल्पा, मुगु, रुकुम र बाजुरामा अनलाइन टिकट लागु भएको नेपाल नागरिक उड्डयन प्राधिकरण नेपालगन्जका प्रमुख किरण श्रेष्ठले बताउनुभयो। दुर्गममा जहाजको टिकट शक्ति र पावरको आधारमा मात्रै वितरण हुने र सर्वसाधारणलाई जहिले पनि टिकट लिन सास्ती हुने भएकाले ई–टिकट प्रणाली गरिएको उहाँको भनाइ छ। माघ १९ गतेबाट नेपाल एयरलाइन्सको कर्णालीका सबै जिल्लामा ई–टिकट प्रणाली लागु भएको उहाँले जानकारी दिनुभयो ।
संस्कृति पर्यटन तथा नागरिक उड्डयन मन्त्री सुदन किरातीले टिकटमा नागरिकले सास्ती भोग्नु परेको अवस्थाले तत्काल ई–टिकट लागु गरिएको भएको बताउनुभयो ।हवाई र यातायातको समस्याबारे निरन्तर आवाज उठाउँदै आएकी जुम्लाबाट प्रतिनिधित्व गर्ने सांसद छिरिङ ल्यामु लामा तामाङले जुम्लासहित कर्णालीले समस्या भोग्नुपरेको समस्या भनेको जहाज र यातायातको रहेको बताउनुभयो । नेपाल एयरलाइन्स जुम्लाका कर्मचारी डम्बर खत्रीले जिल्लामा पनि अनलाइन टिकट कार्यान्वयन भएको बताउनुभयो ।
