सुर्खेत,१ फागुन । कर्णाली प्रदेशका मुख्यमन्त्री महेन्द्रबहादुर शाहीले जनयुद्धको जगमा लोकतान्त्रीक संघीय गणतन्त्र स्थापना भएको बताएका छन् । मुख्यमन्त्री शाहीले शनिबार २६औं जनयुद्ध दिवसको शुभकामना दिँदै १० वर्षे जनयुद्धको जगमा संघीय गणतन्त्रको स्थापना भएको बताएका हुन् ।
मुख्यमन्त्री शाहीले जनयुद्धका उपलब्धिहरूमाथि प्रश्न गर्नेहरूप्रति सचेत रहनुपर्ने बताएका छन् । ‘महान जनयुद्धका कारण प्राप्त राजनीतिक उपलब्धिहरूको उपभोग गर्ने तर, जनयुद्धलाई अस्वीकार गर्ने, यसको महानतालाई खिसिट्युरी गर्ने प्रवृतिप्रति सचेत रहन आवश्यक छ,’ उनले विज्ञप्तिमा भनेको छन्, ‘१० वर्षीय जनयद्ध, जनआन्दोलन र विभिन्न न्यायपूर्ण आन्दोलनका क्रममा आफ्नो जीवनको आहुती दिने सदिहप्रति श्रद्धाञ्जली व्यक्त गर्नुका साथै घाइते, बेपत्ता तथा अपाङ्गता बनेका योद्धाहरूको उच्च सम्मान गर्दछु ।’
