जनकपुरका पूर्वमेयर कृष्ण गिरीको कोराना भाइरस संक्रमणको कारण मंगलबार राति काठमाडौंमा मृत्यु भएको छ । ७३ वर्षीय गिरीलाई १५ दिनअघि कोरोना भाइरस संक्रमण पुष्टि भएको थियो ।
कोरोनासँगै अन्य जटिल समस्या समेत रहेका उनलाई थप उपचारका लागि काठमाडौंको मेडिसिटी अस्पतालमा भर्ना गरिएको थियो । उनको मंगलबार राति १२ बजेर १० मिनेटमा मृत्यु भएको हो ।
उनी जनकपुरको मिल्स एरियास्थित रामा होटलका सञ्चालकसमेत हुन् । गिरीलाई कोरोना भाइरस संक्रमण पुष्टि भएपछि श्री एयरलायन्सको विमान चार्टर गरेर काठमाडौं लगिएको थियो ।
गिरी ०४४–०४५ सालमा जनकपुर नगरपालिकाको मेयर भएका थिए । उनी नेपाल परिवार नियोजन संघ धनुषाको २५ वर्षसम्म अध्यक्ष रहेका थिए ।
नेपाली कांग्रेसको महासमिति सदस्य समेत रहेका गिरीको दुवै छोरा डाक्टर हुन् ।
